Yaadein...

Kuch bhooli-bisri yaadein hai,
kuch misri se meethi yaadein hai,
kuch jasbaati si ye aakhein,
kuch uljhi-suljhi si zulfein,
ek thandi hawaa ka jhoka aake
unhe dheere se sehlaate hai.
Kuch bhooli-bisri yaadein hai,
kuch misri se meethi yaadein hai.

Kabhi sochke lub muskaate hai,
kabhi aakhein num ho aate hai,
kuch mere daaman me simti hui,
kuch samay ke dhool me lipti hui,
kabhi fursat ki ghadi mili to
us dhool ko hum sarkaate hai.
Kuch bhooli-bisri yaadein hai,
kuch misri se meethi yaadein hai.

Kuch mehez puraani baatein hai,
kuch pyaari si saugaatein hai,
in anjaane raaho par
kuch anjaani mulakaatein hai,
in palbhar ki mulakato me
kuch dhundle se pad jaate hai,
kuch humraahi ban jaate hai.
Kuch bhooli-bisri yaadein hai,
kuch misri se meethi yaadein hai.

Rozana ki bhaga daudi me
kai sapne tootkar bikhar jaate hai,
kuch yu hi sang beh aate hai,
kuch adhoore se reh jaate hai,
un sapno ko pankh dekar,
apni chunri me pirokar,
ye satrangi chunar lehraatein hai.
Kuch bhooli-bisri yaadein hai,
kuch misri se meethi yaadein hai.

Waqt ka pahiya chalta hai,
hum bhi sang chalte jaate hai,
anjaane me,majboori me,
khwahisho ki pehredaari me,
kuch naayaab sa peeche chod aate hai,
ye wohi puraani baatein hai,
mere pehlu me jhilmilati
kuch ojhal shaamein-raatein hai.
Kuch bhooli-bisri yaadein hai,
kuch misri se meethi yaadein hai.

Apni parchaai ki is kadi se
jab bhi hokar hum guzartein hai,
un puraani galiyon ki fizaayein
mere rooh tak ko mehkaatein hai,
kabhi mushkil bhi aa jaaye to
jinhe sochke dil behlaate hai,
aisi bhi kuch yaadein hai,
kuch geeli mitti ki khushboo,
kuch bin baadal barsaatein hai.
Kuch bhooli-bisri yaadein hai,
kuch misri se meethi yaadein hai.